У Магілёўскай вобласці пабудавалі больш арэнднага жылля. Пры гэтым чарга на кватэры ў рэгіёне — адна з самых вялікіх

Магілёўская вобласць выйшла ў лідары Беларусі па будаўніцтве арэнднага жылля. За першае паўгоддзе 2026 года тут пабудавалі каля 60 тысяч квадратных метраў такіх кватэр. Для параўнання, у Гомельскай і Віцебскай абласцях за гэты ж перыяд увялі па 31 тысячы квадратных метраў.

Чытайце таксама: Кватэр для маючых патрэбу будуюць усё менш. А людзей тым часам не перасяляюць або плануюць знесці іх дамы

Пра гэта расказаў намеснік міністра архітэктуры і будаўніцтва Аляксандр Шваюноў.

Магілёўшчына стала лідарам на фоне росту ўвагі да арэнднага жылля

Павышаная ўвага да арэнднага жылля з боку ўладаў з’явілася пасля таго, як гэтай тэмай зацікавіўся Аляксандр Лукашэнка.

Пры гэтым лідарства Магілёўскай вобласці трэба разглядаць у кантэксце агульнага аб’ёму будаўніцтва. Паводле дадзеных Белстата, за студзень–ліпень 2026 года Магілёўская вобласць стала адзіным рэгіёнам, дзе агульны ўвод жылля вырас у параўнанні з мінулым годам.

У вобласці ўвялі амаль 246 тысяч квадратных метраў жылля супраць 233 тысяч за такі ж перыяд 2025 года.

У іншых рэгіёнах паказчыкі былі ніжэйшыя за леташнія:

• у Мінску — 172,9 тысячы квадратных метраў супраць 363,3 тысячы;
• у Гомельскай вобласці — 212,3 тысячы супраць 231,4 тысячы;
• у Віцебскай вобласці — 162,5 тысячы супраць 165,1 тысячы.

Цяпер рэгіёны не атрымліваюць агульнага задання па жыллі

З 2026 года падыход да планавання жыллёвага будаўніцтва змяніўся. Урад больш не ўстанаўлівае абласцям агульны аб’ём уводу жылля. Заданні цяпер датычацца толькі жылля, якое будуецца за бюджэтныя сродкі альбо з дзяржаўнай падтрымкай.

Прыкладна палову такога аб’ёму складае арэнднае жыллё.

Таму і паказчыкі перавыканання ў рэгіёнах цяпер лічацца адносна гэтых заданняў. У жніўні Магілёўскі аблвыканкам паведаміў, што за першае паўгоддзе ў вобласці ўвялі ў 1,6 раза больш жылля, чым было запланавана. Па арэндным жыллі перавыкананне склала ўжо тры разы.

Аднак калі гаворка ідзе пра жыллё, якое людзі будуюць ва ўласнасць з дзяржаўнай падтрымкай, карціна іншая, заўважыла «Магілёў.медыя»..

Па выніках дзевяці месяцаў 2025 года аблвыканкам прызнаў невыкананым заданне па ўводзе жылля з дзяржаўнай падтрымкай. Гэта кватэры, якія чаргавікі будуюць ва ўласнасць з выкарыстаннем льготнага крэдытавання.

Арэнднае жыллё не становіцца ўласнасцю

Арэнднае жыллё мае іншы механізм. Кватэра застаецца дзяржаўнай, а чалавек атрымлівае яе ў арэнду. Пры размеркаванні ў першую чаргу ўлічваюцца патрэбы вайскоўцаў і асоб, прыраўнаваных да іх.

Колькасць пабудаваных квадратных метраў сама па сабе не паказвае, наколькі лёгка атрымаць такую кватэру. Пра гэта сведчаць і чэргі.

У Віцебскай вобласці на адну арэндную кватэру прэтэндуюць ад пяці чалавек. У Магілёўскай вобласці і Мінску гэты паказчык значна вышэйшы — ад 39 да 60 чалавек на адну кватэру.

Новае жыллё будуюць, але старых праблем менш не становіцца

Праблема жылля ў Беларусі, аднак, не зводзіцца толькі да колькасці новых квадратных метраў.

З аднаго боку, сотні тысяч сем’яў стаяць на ўліку як тыя, хто мае патрэбу ў паляпшэнні жыллёвых умоў, а колькасць кватэр, якія будуюцца для іх, за апошнія гады прыкметна скарацілася.

З другога — у гарадах застаецца стары і пустуючы жыллёвы фонд. Частку дамоў рассяляюць і зносяць, частка гадамі чакае свайго лёсу. Ёсць і жыхары, якія працягваюць жыць у старой забудове, пакуль планы па яе рэканструкцыі застаюцца на ўзроўні праектаў. У Бабруйску, напрыклад, людзі сутыкнуліся ўжо з іншай праблемай: іх дамы плануюць знесці дзеля будаўніцтва новага мікрараёна — пра гэтую сітуацыю раней пісала BGmedia.

У выніку ў розных гарадах людзі сутыкаюцца з рознымі праблемамі: адным не хапае новага жылля, іншыя чакаюць перасялення са старых дамоў, а трэція рызыкуюць страціць прыватнае жыллё дзеля новай забудовы і пры гэтым не ведаюць дакладных тэрмінаў перасялення.

Пры гэтым Магілёўская вобласць застаецца лідарам не толькі па аб’ёме пабудаванага арэнднага жылля, але і па колькасці людзей, якія чакаюць яго атрымання.

Чытайце таксама: Справились с проблемами всего за 3 дня? Депутатам показали, как в Каменецком районе разобрались с пустующими домами

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро