Ці могуць аштрафаваць бацькоў за прагулы дзяцей у школе? Праваабаронцы кажуць, што міліцыя распаўсюдзіла няпраўду

Гарадзенская абласная міліцыя заявіла, што бацькоў могуць прыцягнуць да адміністрацыйнай адказнасці, калі іх дзіця без уважлівай прычыны прагульвае школу. Аднак праваабаронцы праверылі гэтую інфармацыю і звярнулі ўвагу, што артыкул КаАП, на які спаслаліся сілавікі, не дазваляе штрафаваць бацькоў менавіта за школьныя прагулы.

Чытайце таксама: Што кітайскі пасол рабіў у Пінску і як Кітай пашырае прысутнасць у адукацыі Брэсцкай вобласці?

Гаворка ідзе пра публікацыю Гарадзенскай абласной міліцыі, дзе са спасылкай на ўчастковага Яўгена Тарасава паведамлялася: калі дзіця прагульвае заняткі без уважлівай прычыны, бацькоў могуць прыцягнуць паводле артыкула 10.3 КаАП. У якасці пакарання называлі штраф да 10 базавых велічынь — цяпер гэта 450 рублёў.

Інфармацыю пасля перадрукавалі розныя медыя.

Але праваабаронцы з «Вясна» разабраліся, што менавіта прадугледжвае артыкул 10.3 КаАП, і прыйшлі да іншай высновы.

Артыкул 10.3 — не пра школьныя прагулы

Частка 1 артыкула 10.3 КаАП прадугледжвае адказнасць бацькоў або іншых асоб, якія іх замяняюць, у выпадку, калі іх непаўналетняе дзіця ўчыніла дзеянне, за якое прадугледжваецца адміністрацыйная або крымінальная адказнасць.

Сам па сабе пропуск школьных заняткаў без уважлівай прычыны адміністрацыйным правапарушэннем або злачынствам не з’яўляецца. Таму, як звяртаюць увагу праваабаронцы, прыцягнуць бацькоў паводле часткі 1 артыкула 10.3 толькі за тое, што дзіця прагульвае школу, нельга.

Ёсць у гэтага артыкула і частка 2. Яна датычыцца іншай сітуацыі — знаходжання непаўналетняга без суправаджэння дарослых у грамадскім месцы ў начны час, з 23:00 да 6:00. Да школьных заняткаў гэта таксама непасрэднага дачынення не мае.

Сцвярджэнне гарадзенскага ўчастковага пра тое, што за прагулы дзіцяці бацькам пагражае штраф паводле артыкула 10.3 КаАП, не адпавядае зместу гэтай нормы.

Што абавязаны рабіць школьнікі

Пры гэтым гэта не азначае, што прагулы ў школе дазволеныя.

Паводле Кодэкса аб адукацыі, вучні павінны рэгулярна наведваць заняткі. Калі дзіця доўга адсутнічае без уважлівай прычыны, гэта можа мець наступствы ў межах адукацыйнага працэсу. Напрыклад, пры працяглай адсутнасці — больш за 30 дзён — магчыма адлічэнне.

Калі ж дзіця прапусціла заняткі праз хваробу або сямейныя абставіны, бацькам неабходна аформіць адпаведнае тлумачэнне ці заяву ў школе ў залежнасці ад працягласці адсутнасці.

Але абавязак наведваць школу і адміністрацыйны штраф для бацькоў — не адно і тое ж.

Падобная гісторыя ўжо была ў Брэсце

BGmedia раней пісала пра іншую сітуацыю, звязаную з прагуленымі ўрокамі.

Берасцейка паказала ў сацсетках паведамленне ад адміністрацыі адной з гарадскіх школ. Паводле яе слоў, 12 вучняў прапусцілі ўрок інфарматыкі, пасля чаго настаўнік паскардзіўся, а бацькоў выклікалі ў школу.

На сустрэчы класны кіраўнік паведаміў, што прапушчаны занятак давядзецца «адпрацоўваць» за грошы. Пазней бацькі атрымалі паведамленні з сумай 32 рублі з аднаго вучня. У выніку за 12 дзяцей атрымлівалася 384 рублі. Аднак у заканадаўстве няма нормы, якая дазваляла б школе проста выставіць бацькам штраф за прагулены ўрок.

Іншая справа, калі школа прапануе дадатковую платную адукацыйную паслугу. Тады ўзнікае пытанне, ці была яна аформленая належным чынам і ці далі бацькі добраахвотную згоду на яе атрыманне.

У выніку, згодна з заканадаўствам, дзіця сапраўды павінна наведваць школу, але гэта не азначае, што бацькоў можна аўтаматычна аштрафаваць на 450 рублёў за кожны прагул, спасылаючыся на артыкул 10.3 КаАП.

Чытайце таксама: Новую дзіцячую пляцоўку ў Магілёве пашкодзілі яшчэ да адкрыцця. Мясцовыя блогеркі загаварылі пра вандалізм

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро